– deıdi akademık, ekonomıka ǵylymdarynyń doktory Saǵyndyq Satybaldın
– Keshe el Prezıdenti Nursultan Nazarbaev halqymyzǵa bir tamasha jańalyqty súıinshiledi. Osy jaqsylyq habardy biz shynynda da kópten beri kútip edik. Minekı, Qazaq eliniń Dúnıejúzilik saýda uıymyna kirýi máselesi sheshildi. Munyń asa kúrdeli ári keleli másele ekendigi áýel bastan málim bolǵan-dy. Bul uıymǵa árkimdi ala bermeıdi. Onyń óziniń qoıatyn talaptary, óreli deńgeıi, búgingi órkenıetke saı ólshemi bar. Osylardyń bárine jaýap berý úshin, tıisti údeden tabylý úshin Qazaqstan birneshe jyldan beri maqsatty túrde tyńǵylyqty daıyndyq jasady.
Mundaı senim bizdiń elimizge qalaı kórsetildi desek, Qazaqstannyń sońǵy ýaqyttardaǵy ósip-órkendeý jolynda kóptegen kókeıkesti máseleler sheshilgenin bilemiz. Solardyń ishindegi bastylarynyń biri – Qazaqstan 2-3 jyl buryn álemdegi ozyq damyǵan 50 eldiń qataryna kirdi. Bul meje 2030 Strategııasynda kózdelgendegiden erterek alyndy. Al endi búgingi atqarylyp jatqan jumystarǵa keler bolsaq, «2050» Strategııasy baǵdarlamasynda elimizdiń jańasha jańǵyryp órkendeýi, álemdegi alatyn orny týraly serpindi mindetter qoıylǵan edi. Demek, osy jumystardyń bári elimizdi DSU talaptaryna laıyqty deńgeıge kótere túskendigi sózsiz.
Odan soń jaqyndaǵy prezıdenttik saılaý ótkennen keıin el aldyna keleli-keleli 5 úlken mindet tartyldy. Osyndaı umtylysty, qulshynysty álem jurtshylyǵy syn kózimen baqylap kórip otyr. Kimniń kim ekenin olar da tarazylaıdy. Ekonomıkamyzdyń órkendegenin tamyrshydaı tap basyp tanıtyn álemdik sarapshylar jeterlik. 2013 jylǵy jahandyq qarjy daǵdarysynan 5 el ǵana qyryn syndyrmastan shyǵa aldy. Olar – Qytaı, Úndistan, Brazılııa, Ońtústik Koreıa jáne Qazaqstan. Osy jaı elimizdiń qaýqar-qarymynyń qandaılyǵyn aıqyn kórsetip turǵan joq pa. Basqa elder qıyndyqtan endi-endi shyǵa bastady. Tipti, álemge áıgili alyp memleket Amerıka Qurama Shtattarynyń ózi daǵdarys quryǵynan bıyl ǵana qutyldy. Osynyń bárin alyp qaraǵan kezde Qazaqstan ekonomıkasynyń ósý qarqyny, sol oraıda jańa tehnıka men tehnologııany qoldaný úrdisi, shetelden tartylyp jatqan ınvestısııa, solardyń utymdy paıdalanylýy – osynyń qaı-qaısysy bolsyn elimizdiń abyroı-bedelin kóterýge qyzmet jasady. Bular óz kezeginde Elbasymyzdyń álemdik ınstıtýttarǵa qol sozǵan kóregendigin bildiredi.
Osynaý halyqaralyq asa úlken de bedeldi uıymǵa kirýimiz bizge ne beredi dep saýal qoıýymyz zańdy. Bul saýda uıymy bizdiń ónim shyǵaratyn kásiporyndarymyzdy sheteldiń bazaryna bastap alyp barady. Árbir otandyq kásipornymyz basqa memlekettermen jeke-jeke shart jasasyp, saýda-sattyqqa jol ashyp, ónimderi men taýarlaryn satý múmkindigine ıe bolady. Ol úshin shyǵarǵan ónimniń joǵary sapada, halyqaralyq standarttarǵa saı bolý kerek. Buǵan jańa tehnıka, joǵary tehnologııa, tyńǵylyqty iskerlik pen tereń bilim ǵana septigin tıgize almaq.
Dúnıejúzilik saýda uıymy degenimiz tek saýda-sattyq qana emes. Bul – halyqaralyq yntymaqtastyq. Osyny durys uqqanymyz maqul. Bul bizdi álem jurtshylyǵynyń moıyndaýy ári qoldaýy dep bilýimiz kerek. Álem bizdi tanydy, biz quryp jatqan qoǵamnyń bolmysyn túsindi. Qazaqstanǵa senip otyr. Áıtpese óz qatarlaryna almas edi. Qazaqstan DSU-ǵa kirýge laıyqty boldy. Sondyqtan, sol senimge kirshik shaldyrmas úshin básekege qabilettiligimizdi, shyǵaryp jatqan ónimderimizdiń sapasyn eselep arttyrǵanymyz jón. Solaı etkende ǵana halqymyzdyń ómir súrý deńgeıi joǵarylaı bermek.
Qazaqstannyń osyndaı taǵy bir álemdik asqar bıikti alyp, Dúnıejúzilik saýda uıymyna kirgenine óz basym óte qýanyshtymyn. Barsha elimizdi quttyqtaımyn. Nursultan Ábishuly Nazarbaevqa Otanymyzdy taǵy bir eren bıikke kótergen, taǵy bir asýdy alǵan eleýli eńbegi úshin myń da bir rahmet aıtqym keledi.
Jazyp alǵan
Qorǵanbek AMANJOL,
«Egemen Qazaqstan».
ALMATY.